香港新浪網 MySinaBlog
« 上一篇 | 下一篇 »
Chris | 22-04-10, 4:22 AM | 香港情 | (2997 Reads)

這次相隔三年重臨香江,看到的有轉變和不變。

據聞政府公布香港居民總數剛突破了700萬,對此我極感懷疑!比較40年前我親身經歷香港號稱「人口400萬」的情況,現在街上所見的人何止是以前的三倍?可能政府發表今日的統計時,流動人口和無證人口沒有計算在內吧。

人口老化的情形更明顯了,街上多了很多拿拐杖和助行架的老人蹣跚而行,更多的是坐輪椅的,後面推著的每每是外籍女傭。乘地鐵時,身邊多了很多印尼裔的戴頭巾的女性,還有很多南亞裔人士 ----不知道是印度、巴基斯坦還是孟加拉人了。

香港的消費市場,大主顧一定是大陸來客了, 我逛了很多次「百老匯」、「豐澤」,這個印象至為明顯。

香港的經濟怎樣?其他的不知道,飲食場所總是擠滿了人。香港的可愛之處是最平和最貴都有得食:在倫敦戲院舊址的「莊氏倫敦廣場」樓上的Hotpot火鍋專門店,私人火鍋午市減價到29元一位,還有一杯飲品!尖沙嘴區的中間道一號稻香集團屬下的「客家好棧」,有貨真價實的「一蚊雞」,一隻雞只賣一元,條件是同時要一碟38元的「羅漢齋」,並無取巧。兩者都是地方雅潔,坐得舒服的食肆,這樣低的價錢真是虧本的啦。

我看見後者貼出招聘員工告示,侍應和清潔阿嬸都是5000餘元,部長也不過是6000元出頭,這樣低的工資,教人怎樣維持生活?大部分的侍應都是講不大流利的粵語,肯定是大陸來的外勞或新移民,一般的服務態度都很殷勤。

地鐵裡,前後左右很多人在講手機,可能是藉此消磨時間吧。

路面多了很多巴士,路線牌上很多我不認識的地名;地鐵、火車網絡星羅棋佈,香港的交通基建近年已經趨於完善,以前擠巴士、塞車的問題況大致上已經解決了。

書店和影碟店的藏量豐富,種類很多,很冷門的都有,就算是外國電影的DVD,都遠勝澳洲的影碟店,香港不愧是國際大都會,我只怕行囊容量不夠,買了根本沒有時間看,惟有盡量忍手。

家住油麻地,我晚上回家時大多取道廟街,順便逛逛平價地攤。廟街幾十年來都是政府默許的娼妓區,眾人皆知;以往都是年老的「龜婆」,站在地下樓梯口向路過的單身漢搭訕拉客,現在卻是三五成群的妙齡北姑,言笑晏晏,搔首弄姿,好生觸目。

舊區餅家的「蛋撻」、「老婆餅」,「澳洲牛奶公司」的 24元「多士+煎雙蛋+火腿通粉+奶茶」早餐,一樣的抵食。

不變的,當然還有還有「恭和堂」 的龜苓膏,和「義順」的燉牛奶。


(文章允許轉貼,請具作者名字:梁煥松)


[1]

如果去淨係叫稻香嗰間,直情一蚊隻雞咋,不用加$叫其他野同埋任叫冇限,隻雞仲要好食,我上次同屋企人喺荃灣稻香食左四隻一蚊雞同兩個小菜,哈!


[引用] | 作者 peekaboo | 22-04-10 6:46 AM | [舉報垃圾留言]


「寒」少少bor!

[引用版主回覆] | 作者 Chris | 22-04-10 12:34 PM

[2]

Chris兄簡潔一文論盡現今香港特色。


[引用] | 作者 electrosphere | 22-04-10 7:00 AM | [舉報垃圾留言]

emotion

[引用版主回覆] | 作者 Chris | 22-04-10 12:35 PM

[3] Re: Chris

旁觀者清。我們在香港生活的已日漸麻木了。


[引用] | 作者 Raymond | 22-04-10 8:06 AM | [舉報垃圾留言]


日日見住,當然習慣成自然啦。

[引用版主回覆] | 作者 Chris | 22-04-10 12:37 PM

[4]

黑市人口幾時都有,而旺區擺明好多大陸客。如果用旺區情況來睇,會好多人咁湧入行街,每多一個人,遊人可能會幾何級數咁升。

香港唔單止多咗南亞人,東南亞人,連非洲人都多咗。深水埗見到佢去批發舖頭,應該做買賣。

之不過變得快嘅,多數係最旺嘅區,行過幾條街,就無變得咁快。

地鐵同火車合埋一間公司,個鐵路網絡就大咗好多咁。


[引用] | 作者 omnibus | 22-04-10 8:18 AM | [舉報垃圾留言]


不止是現在了,十幾年前我還在香港時,有日附近一棟樓發生劫案,差人守住大廈出口逐個出來的人查身分證,意外收穫,半日就截到好幾個無證之人。

[引用版主回覆] | 作者 Chris | 22-04-10 12:40 PM

[5]

我以前也常去恭和堂吃龜苓膏的。


[引用] | 作者 readandeat | 22-04-10 8:52 AM | [舉報垃圾留言]


食來食去,還是這家老店好。

[引用版主回覆] | 作者 Chris | 22-04-10 12:41 PM

[6]

「肯定是大陸來的外勞或新移民,一般的服務態度都很殷勤。」

才不是呀.......其實有很多是「好食懶飛」、老闆在才會工作。=﹏=


[引用] | 作者 路人 | 22-04-10 8:55 AM | [舉報垃圾留言]


咁都有?

[引用版主回覆] | 作者 Chris | 22-04-10 12:42 PM

[7] 茶餐廳

澳洲牛奶公司」的 24元「多士+煎雙蛋+火腿通粉+奶茶」早餐,一樣的抵食。

全港最寸的一間茶餐廳.平均每個客逗留時間20分鐘,伙記企堂大大話話10名以上,大大聲講,一位,兩位,late道嗰道.不受歡迎慢慢享受報紙人仕 .d嘢吾錯,由其抄蛋及牛油麵包,奶荼都有80分.我飲咗奶荼大大話話40年由10歲左右老父帶我到中環蛇dow,現每日起碼三杯.


[引用] | 作者 wiki | 22-04-10 9:28 AM | [舉報垃圾留言]


20分鐘,俾多你了,我見很多都是10分鐘內食完起身。
另外門口排著隊買外賣!

[引用版主回覆] | 作者 Chris | 22-04-10 12:46 PM

[8]

Chris兄,咁你覺得係咪越變越好呢?一國兩制係咪好好呢!比起英治時代更繁榮呀!
…老人出街有外傭照顧,
…國內同胞願意收取低微人工、而付出高水準的服務,
…無祖國的支持,又點會食到一蚊雞和睇到通街都係又平、又靚嘅大 陸?!(唔想用呢個帶(無肉)嘅字)
…佢哋話搭車唔講手提、咁做咩好呀!好無聊架!仲又大大聲講先至過引架。
Chris兄,得閒又番嚟趁下熱鬧喇!


[引用] | 作者 albxxt | 22-04-10 10:38 AM | [舉報垃圾留言]


好不好,見仁見智了。
我是比較懷舊的,回香港四次,國際金融中心都未上過!

[引用版主回覆] | 作者 Chris | 22-04-10 12:48 PM

[9]

地鉄網是大了,不過比以前更擠,現在非上下班繁忙時間,都人頭湧湧,說著粵語以外的言語,有時懷疑自己非置身香港。

chuan
[引用] | 作者 chuan | 22-04-10 11:22 AM | [舉報垃圾留言]


人口結構改變,社會風俗化隨之而演化,一定的囉。

[引用版主回覆] | 作者 Chris | 22-04-10 12:50 PM

[10] Re: chuan
chuan :
地鉄網是大了,不過比以前更擠,現在非上下班繁忙時間,都人頭湧湧,說著粵語以外的言語,有時懷疑自己非置身香港。

同意,身處-[齋哪]正確英語讀法 Chris Patten tone,不是[差哪]


[引用] | 作者 wiki | 22-04-10 11:34 AM | [舉報垃圾留言]

[11] any changes

http://www.youtube.com/watch?v=teqMQhff6oE

Chris Patten remarks on HK 10 years change.


[引用] | 作者 wiki | 22-04-10 11:53 AM | [舉報垃圾留言]

[12]

貧者越貧,富者越富!!


[引用] | 作者 nana | 22-04-10 12:09 PM | [舉報垃圾留言]


如果要我回流,拿著雞碎咁多退休金,都幾難生存。

[引用版主回覆] | 作者 Chris | 22-04-10 12:52 PM

[13] Re: 路人
路人 :
「肯定是大陸來的外勞或新移民,一般的服務態度都很殷勤。」
才不是呀.......其實有很多是「好食懶飛」、老闆在才會工作。=﹏=


邊個打工仔唔係老細喺度先至落力做嘢架!
唔好咁話佢哋喇,半斤八兩"遮",咁嘅人工交咁嘅差!去D要500蚊食個早餐嘅地方咪good service 囉!


[引用] | 作者 albxxt | 22-04-10 12:13 PM | [舉報垃圾留言]

[14] Re: chuan
chuan :
地鉄網是大了,不過比以前更擠,現在非上下班繁忙時間,都人頭湧湧,說著粵語以外的言語,有時懷疑自己非置身香港。


非置身香港?咁係邊處?大陸?咪對囉!回歸咗嗎?已經返回母親嘅懷抱喇!


[引用] | 作者 albxxt | 22-04-10 12:19 PM | [舉報垃圾留言]

[15] Re: Raymond
Raymond :
旁觀者清。我們在香港生活的已日漸麻木了。


講得啱!真係麻木喇!
生活在這裏的己木無表情,
來消費的過客就覺得過"引"。


[引用] | 作者 albxxt | 22-04-10 12:27 PM | [舉報垃圾留言]

[16]

唉!唔好意思!Chris兄,今朝玩大咗!


[引用] | 作者 albxxt | 22-04-10 12:30 PM | [舉報垃圾留言]


你的按語都幾「到肉」呀。

[引用版主回覆] | 作者 Chris | 22-04-10 12:53 PM

[17]

老實講,我都覺得近幾年多咗好多南亞裔人士,而且應該是本地出生/長住,唔似外勞

simon/示芒
[引用] | 作者 simon/示芒 | 22-04-10 2:15 PM | [舉報垃圾留言]


有些能說流利廣東話,可能是本地出生的了。

[引用版主回覆] | 作者 Chris | 22-04-10 2:53 PM

[18]

多謝分享。
等你這題目的下集....


[引用] | 作者 allie | 22-04-10 4:39 PM | [舉報垃圾留言]


有!

[引用版主回覆] | 作者 Chris | 22-04-10 6:23 PM

[19] Re: peekaboo
peekaboo :

如果去淨係叫稻香嗰間,直情一蚊隻雞咋,不用加$叫其他野同埋任叫冇限,隻雞仲要好食,我上次同屋企人喺荃灣稻香食左四隻一蚊雞同兩個小菜,哈!



馬龍漫畫

1. $1 雞 cheap
2. $10 T-Shirt Cheap
3. $12-$15 特價
4. 接住有人話 "再唔來就蝕底喇!"
(原來 Disney land 加價...)

家中細佬不回香港,佢話香港悶,屋不大,冇朋友人倍
相反我在 NZ 好悶,假期大多回港沖下電

「澳洲牛奶公司」 我坐幾耐都得,
可能我一個人去食..亦冇"催"人走


[引用] | 作者 Alank | 22-04-10 6:03 PM | [舉報垃圾留言]


照計都唔會催人走的。

[引用版主回覆] | 作者 Chris | 22-04-10 6:25 PM

[20] Re: Alank
Alank :
peekaboo :

如果去淨係叫稻香嗰間,直情一蚊隻雞咋,不用加$叫其他野同埋任叫冇限,隻雞仲要好食,我上次同屋企人喺荃灣稻香食左四隻一蚊雞同兩個小菜,哈!

馬龍漫畫
1. $1 雞 cheap2. $10 T-Shirt Cheap3. $12-$15 特價4. 接住有人話 "再唔來就蝕底喇!"(原來 Disney land 加價...)
家中細佬不回香港,佢話香港悶,屋...


嘩!老兄你冲/义一次電都好貴啫!NZ-HK要搭飛機哦!好似行路同游水都會幾吃力架!
衹要你不停叫嘢食,有幫襯。佢(茶餐廳)梗係唔會趕你走喇!連白眼都冇添!果間由朝旺到晚,一杯奶茶/一個餐坐一日,無白眼、無說話聽,除非你時運高,睇唔到、聽唔到喇!唔通係AUS同NZ關係friend D ?


[引用] | 作者 albxxt | 22-04-10 7:59 PM | [舉報垃圾留言]

[21] Re: Chris
Chris :
如果要我回流,拿著雞碎咁多退休金,都幾難生存。

有舊同事移民加拿大,去時退休金折合約有幾千CAD元, 現時加元兌美元(=HK$)升值約35%, 他大歎減收入35%,得要節約呢!


[引用] | 作者 nana | 22-04-10 8:51 PM | [舉報垃圾留言]


我去年初領香港退休金時澳元兌港元匯率5.70,現在是 7.20,死未?!

[引用版主回覆] | 作者 Chris | 22-04-10 9:34 PM

[22] Re: 路人
路人 :
「肯定是大陸來的外勞或新移民,一般的服務態度都很殷勤。」
才不是呀.......其實有很多是「好食懶飛」、老闆在才會工作。=﹏=


咁又唔好一概而論,人有勤有懶,同土生土長嘅都係一樣。有時都要睇做咩位。


[引用] | 作者 omnibus | 22-04-10 9:06 PM | [舉報垃圾留言]


你的講法合理。

[引用版主回覆] | 作者 Chris | 22-04-10 9:36 PM

[23]

我住大埔村屋,最近幾年鬼佬出沒次數多左。


[引用] | 作者 | 23-04-10 1:25 AM | [舉報垃圾留言]


聽說南丫島、長洲也很多。

[引用版主回覆] | 作者 Chris | 23-04-10 6:21 AM

[24] Re: Chris
Chris :
「寒」少少bor!


我見到有些人夠膽只叫一蚊雞食不叫其他,埋單比埋茶芥及加一,咁都得?!不過酒樓啲人冇乜唔like woo,可能佢地忙兼見慣掛.


[引用] | 作者 peekaboo | 23-04-10 2:21 AM | [舉報垃圾留言]

[25] Re: 司
:

我住大埔村屋,最近幾年鬼佬出沒次數多左。



南丫島、長洲也很多。

Chris
[引用] | 作者 Chris | 23-04-10 6:23 AM | [舉報垃圾留言]

[26]

假使問我,我實會話香港大體上喺'97後係更加變衰咗。

但如果要我解釋理由,就真係罄竹難書,我都唔知從何講起。

Hotpot打邊爐確係唔錯,唯一差咗啲就係個啲肥牛肉,同埋打烊時間太早,不過以其不貴價錢算係咁。


[引用] | 作者 賈真 | 23-04-10 3:52 PM | [舉報垃圾留言]


各位香港長期居民,說話比我更有力。

[引用版主回覆] | 作者 Chris | 23-04-10 8:01 PM

[27]

人多的問題是因為興建了這麼多高層的大廈, 增加了人口的壓力。


[引用] | 作者 a | 23-04-10 5:49 PM | [舉報垃圾留言]


前因後果是這樣的?

[引用版主回覆] | 作者 Chris | 23-04-10 8:02 PM

[28] 每況愈下

究竟是人的要求低了?
還是人們已被同化呢?
香港更進一步成為世界大都會?
抑或‧‧‧

陸橋
[引用] | 作者 陸橋 | 24-08-10 10:35 AM | [舉報垃圾留言]


香港在退步中了,這不是多幾棟七八十層高的大廈可以挽回的。

[引用版主回覆] | 作者 Chris | 18-09-10 8:20 PM